Hamorawon han Samar-Leyte ha Luzon molave
Mahamot nga adgaw hamorawon nga babaye
Kulipapa nga tugas-adgawon, pareho nga klase
Sisiyam nga miyembro and pamilya hene
Vitex an apelyedo, asay an Borongan Tree
Damo an estorya hene nga tanaman
Mga sosomaton han katigorangan,
Madig-un guihapon sugad het hamorawon:
Kahoy nga ilawudnun di-napahirayo ha labnasan
Diri maturuk iton kon bob-o-ngan di bati-un,
An tosak han kalaw daku nga natalaw
Kay sogad hin pothaw kahoy nga masilaw,
Tabla nga madulaw han salug nga malinaw
Kamakahiridlaw ngan makabaranhaw,
Maka-un nga anay asay an na-iway,
Bato nga harigue bagyo napahoway,
Sapyo di-na-ibas paborito han panday,
An da-an nga silyon madig-un kaopay
Lima na nga amay ona pa nagpatay.
Layaw an pagturuk dinhi nagporondok
Habubu nga tona borabod ha Lupuk
Marasa nga tobig masayon pagsarok
Dinhi an pag-usup han baboy ngan bogsok
Mga magdarakup dinhi pagtitirok.
An kahoy ngan panit gamit han tambalan,
Namatron nga tiyan, mga nahilohan nahohowasan.
An gamot may taguk, borabod tinaponan
Sinangay an ngaran, tobig tambal daman
Nagbabalon an namatron ta-usa ka galon.
Borongan nga bara-an han langit ikaw guintagan
Bogtong kadung-ganan, doble kabuenasan:
Kahoy nga bolawan kasing-kasing nga bu-utan
Ngan borabod nga alogan maopay nga batasan.
Imo karikohan diri maglulubad, ngan diri huhub'san.
YUSEF BINYAMIN ALI
14 Pebrero 2000
