"B" |
OMAGAD HAN ADLAW, ASAWA HAN ARUM (Kanta Han Borongan) |
Hadton cada-anan an Sawang guba pa Ha Sabang damu na parag-dakup parag-oma An baboy ngan bogsok gindadakup nira Ira gin hahanip nai-way ha ira. Asay kadiskobre borabod nga malinaw Hamorawon nga marampag, tobig nga mali-haw Gin dada-op ini hadton ino-ohaw Napahoway dinhi adton binubutlaw. Bisan pa mahoraw diri hinuhubsan Tobig nga marasa di-nawawaraan Ha kama-iha-an asay hin ara-an Binalhin ha Sawang bongto han Borongan. Natikang ha dagat nga dara ni Arum Natoro ha hagna, tahos ha ilarum Ngan igin-sasagpon ni Tona halarum Na-olpot ha Sawang, Borabod mataghum. Adton mga sapa ha ka-irayahan Borabod ngan salog magkaborogto-an Mga anak hira ni Tona Borongan Ngan iya asawa hi Arum Oran. Salog magkaroha Lo-om ngan Borongan Ini hi Can-obing ira manghod naman Kabogto-an daman Soribao, Maypangdan Damu pa nga sapa, ngan salog Tabonan. Hi arum masirum, hi Bagyo makusog Hi Hangin haropoy ngan hi ogis Dampog Mga anak hira ni Adlaw Dalug-dug Dagat Pacifica, iton iya arug. Ira mga anyaw hi Bokid Hataas Nga asawa naman ni Guba Daganas Mga anak nira hi Tona, Palanas, Balangaw ngan Borong, kon tobig di kablas. An karuyag sidngun mga kabogto-an Diri ma-o-obos aton karikohan Pabalik-balik la an arum ngan oran An pagpahimolos, asay an pag-adman. Bag-o nga milenyo yana madatung na Kadamu han tawo unum ka bilyon na Mainom man hira, an tobig mahal na Ha Borabod Borongan ma-alog hira. Pero diri daman angay nga toyangan An mga aboso angay nga mapugngan Iton atun guba angay ta ogopan Atun pagbantayan mga kakahoyan. An oran nga grasya atun gin popolsan Magigin disgrasya baha nga taragman An borabod, sapa ngan mga kasalogan Piho mahubas gud kon wara kagugub-an. YUSEF BINYAMIN ALI 25 Agosto 1999 |
